باين من عنوانه

انت محتاج تتحب… للاستشارية النفسية سمر درويش

كتبت – سمر درويش
بيجي للمعالج النفسي استشارات من نوعية:
– بطل يهتم بيا زي الأول
– بطلت تدلعني
– عاوز حد يحس بيا
– عاوزة ألقى حضن من غير ما أتكلم أو أحكي
– نفسى ألقى شعوري متقدر
– مفتقد الحنية والرومانسية
جمل بقى زي كده بنفس المعاني
الجمل دي حلها كلمة واحدة
“انت محتاج تتحب”
بس أغلب الجمل دي لناس في علاقات جواز، خطوبة..
يتحب إزاي ده هو أصلًا في علاقة؟
مش كل علاقة قدامك معناها إنها علاقة حب أو مشاركة وسكن ومودة ورحمة..
حد هيقول
– بس الحب مبيتغيرش
الحب يا عزيزي في نفسه مبيتغيرش كمفهوم
العيب فيكم يا في حبايبكم
– نعم!!
أيوه الحب مبيتغيرش بس بيتأثر..
وعشان بيتأثر.. يا إما بيفضل حب بس معكر، يا إما بيتلوث نهائي وبيكون مادة غير المادة زي المياه هي هي نفس شكل المياه مع الخل من برا بس المضمون من جوا إيه؟!

علاقة الحب لما بتتأثر سواء نص نص معكرة يعني.. أو بايظة خالص بنفضل ماسكين في العلاقة باسم الحب رغم أنه بقى حاجة تانية خالص وبعد كده بنشتكي من الحب..
يبقى العيب فيكم وفي حبايبكم ولا لا؟
بس نروح للنقطة الأهم وإن أغلب علاقات الحب مش حب ممكن جدا وهم الحب هو اللي يخليه حب..
عاوزة أعيش الحالة وخلاص أكرش ويكرش عليا، بلغة الشباب دلوقتي، فنخلق أنفسنا وهم الحب وساعات بنزودها ويتخطبوا ويتجوزوا وفرح وليلة ويكبر الوهم لحد ما يفرقع في وشهم..
نوع تاني..
حب الشباب والمراهقة طبعًا مش كله طيش بس الغالب جدًا منه مش ينفع يبني بيت وسكن ورحمة لأسباب منها:
* طرفي العلاقة مش فاهمين نفسهم ولا محددين اختيارتهم في الحياة فإزاي يكونوا مسؤولين عن كيان وسرح اسمه الحب فلازم تفهم نفسك وثوابت شخصيتك كويس الأول..
* أغلب مشاعر المرحلة دي متهورة غير ناضجة أو متزنة عاوزين نبقى سوا وخلاص مين هدفه إيه أو إزاي طيب حد شايف بكرة ولا أي كلام على رأي اللمبي “لا دلوقتي”!!

- الإعلانات -

في بقى علاقات الحب اللي بتتبني بالعشرة لما هنتجوز هنعرف بعض والعشرة بتولد الحب والكلام الطيب ده..
هو بيحصل آه بيحصل بس بعد ما نخبط في بعض ونقص ونلزق في قلوب بعض لغاية ما نخليها على قد المقاس وفي الآخر العلاقة مبتبقاش اسمها حب برضو رغم أنهم بيشوفوها كده وبيقنعوا نفسهم دي اسمها زُهد يلا أيام وبنعيشها هنرازي بعض ليه؟!
في نوع بقى وده بيقع فيه الناضجين والواعين ألا وهو انبهرت به/بيها وده لما بيشوف حد مختلف أو مميز شوية لان دماغهم العالية بتكون شايفة عقول اللي حواليهم فبيلاقوا في الشخص ده شيء مميز فبالتالي أحسن الوحشين وهو ده اللي كنت بدور عليه ونبدأ نقنع بيه نفسنا ما هي الساحة بايظة..
فكل الأمثلة اللي فاتت دي مش حب..
وعشان كده البيوت فيها مشاكل والمُسكّن بتاعها عشان الحب اللي بينا اللي هو زي المياه بالخل مش حب هو شبه..
كان في مقولة لغادة كريم بتقول “الروح لا تستكين إلا بالحب” لو بصينا للشعار ده هتلاقي أن ثورات الغضب اللي جوانا والسخط والضيق بالعلاقات ده بسبب إن الحب مطلعش حب والروح فعلًا لا تستكين ولا تهدأ إلا بالحب..
بس أي حب بقى؟

الحب الناضج غير المشروط
بحبك ومتقبلك رغم التشابه والاختلاف
بشجعك وبزقك لقدام مش بزقك على وشك بقارن حياتي بوجودي معاك بقت أحلى إزاي مش بقارن عقلى بعقلك وإنجازي بإنجازك ورجولتي بإنوثنك وأنوثتي برجولتك..
ببني فيك زي ما ببني في نفسي مش داخل مسابقة مين هيبنى نفسه أسرع..
أجرى عليك في الفرح والغلط والحزن مش آخر حد يعرف ولا أحط أي اعتبارات..
الحب لو دخله كذب يلا بالسلامة عليه..
أهلي أهلك وأهلك أهلي.. محدش مسموح له يسرق السلام النفسس ده بندخل الأسر نكبر مش نتقطع من بعض..
انت حلالس وأنا حلالك.. وانت حرامي اللي هو حلالي لا حدود ولا مسافات بينا وده للمتزوجين مش عارف أعير ولا مكسوفة ولا هتحرج ولا هتبص لي إزاي إيه ده!
البراح البراح اللي بيتولد مع بهجة وجوده..
الأنس بحبيبك مهما بالدنيا ناس مش بتفك منه بالناس..
بيشاركوا بعض بتلقائية مش بيصطنعوا المشاركة ويخلقوا الحوار هما دايمًا بينهم حوار حتى لو بالروح..
سند وظهر لبعض وهنا بييجي الأمان مش حواجز وأبواب مصدودة بحياة بعض باسم الحب والخوف عليك وانتي بتاعتي وانت ملكي والكلام التملكي المرضي ده..
بالحب وحده انت غالي عليا..
بالحب وحده انت ضي عنيا..
بالحب وحده وهو وحده شوية..
لا طبعًا مش شوية..
لما هتراجع النقط دي هتضرب نص العلاقات بالخلاط..
عرفت إن علاجك دلوقتي..
إنك تتحب..

- الإعلانات -

شاركنا الرأي

لن يتم نشر عنوان بريدك الإلكتروني.